विदेशमा बस्दै आएका एक व्यक्तिको दुई करोडभन्दा बढी मूल्य पर्ने जग्गा उनलाई थाहै नदिई बिक्री भएको छ । नक्कली जग्गाधनी प्रमाणपत्र बनाई जग्गा बिक्री भएको हो । अर्काको जग्गा बिक्री गरी करोडौं कमाउन खोज्ने दुई जना भने प्रहरीको फन्दामा परेका छन् ।
विदेशमा रहेको मौका छोपी रुपन्देहीका रसिब धिताको बूढानिलकण्ठस्थित दुई रोपनी जग्गा नक्कली कागजपत्रका आधारमा बिक्री भएको हो । नक्कली जग्गाधनी प्रमाणपत्र तथा धितालको नाममा नक्कली नागरिकता बनाएर जग्गा खरिदबिक्री गर्ने झापा घर भई गोंगबु बस्ने सुमन श्रेष्ठ र बूढानिलकण्ठका कान्छा थापा पक्राउ परेका हुन् । केन्द्रीय अनुसन्धान व्युरो (सिआइबी)ले उनीहरुलाई शुक्रबार पक्राउ गरेको नयाँ पत्रिकामा खबर छ ।
सिआइबीका अनुसार अभियुक्त श्रेष्ठले आफूलाई रसिव धितालका रुपमा प्रस्तुत गरी सो जग्गा राजन श्रेष्ठलाई १ करोड ५५ लाख रुपैयाँमा बिक्री गरेका थिए । वास्तविक जग्गाधनी धितालले आफ्नो जग्गा बिक्र भइसकेको थाहा पाएपछि प्रहरीमा उजुरी गरेका थिए । मालपोत कार्यालयबाट उनको जग्गा राजन श्रेष्ठका नाममा नामसारी भइसकेको थियो । श्रेष्ठले पनि सो जग्गा अन्य व्यक्तिलाई बिक्री गरिसकेपछि मात्र किर्ते भएको तथ्य खुलेको हो ।
घिताल परिवारले २०४० सालमा सो जग्गा एक लाख रुपैयाँमा खरिद गरी पूर्वजग्गाधनीलाई नै कमाउन दिएका थिए । तर, जग्गाधनी लामो समयसम्म सम्पर्कमा नभएपछि सुमन श्रेष्ठले आफू जग्गाधनीको छोरो भएको भन्दै सो जग्गाका मोहीलाई १० लाख रुपैयाँ दिएर फकाई नक्कली धनी बनेर जग्गा बिक्री गरेका हुन् ।
यसरी जग्गा किर्तेको काममा चाबहिल मालपोतका कर्मचारीसमेतको मिलेमतो रहेको स्रोतले दाबी गरेको छ ।
shrot onlinekhabar
Post a Comment