काठमाडौँ, ३१ साउन । १० दिन अघि काठमाडौको भीमढुंगामा प्रहरी कारबाहीमा मारिएका भनिएका चर्चित गुण्डा नाइके दिनेश अधिकारी ‘चरी’ को शनिबार पोस्टमार्टम भएको छ। तर, पोष्टमार्टम गरेर हेर्दा घटना झनै रहस्यमय देखिएको आफन्तको दाबी छ ।
घटना रहस्यमय भएको भन्दै पोस्टमार्टम भएपनि परिवारले लाश बुझ्न मानेका छैनन । पोस्टमार्टम गर्दा चरीको शरीरमा सात गोली लागेको उनका परिवारले जानकारी दिएका छन् । परिवारले दिएको जानकारी अनुसार चरीलाई हानेको ६ गोली पछाडिबाट अगाडि निस्किएको र एक गोली मेरुदण्डले छेकेर राखेको पत्ता लागेको छ । प्रहरीले भने आठ राउण्ड गोली लागेको बताएको थियो । सत्यतथ्य छानबिन नगरेसम्म लाश नबुझ्ने परिवारको अडान छ ।
यसरी गरियो पोष्टमार्टम
साउन २३ गते काठमाडौंको भीमढुंगामा प्रहरीसँगको मुठभेडमा मारिएका चरीको मृत्यु गोली लागेपछि अत्याधिक आन्तरिक रक्तश्रावका कारण मृत्यु भएको पोष्टमार्टमबाट खुलेको छ ।
शिक्षण अस्पताल महाराजगञ्जमा शनिबार डा हरिहर वस्ति नेतृत्वको चिकित्सकको टोलीले चरीको शव पोष्टमार्टम गरेको हो । पोष्टमार्टमका क्रममा चरीका आफन्तको सिफारिसममा मनमोहन मेमोरियल अस्पतालमा कार्यरत चिकित्सक रामकुमार अधिकारी पनि संगै थिए ।
चरीका आफन्त आफ्नो तर्फबाट एक चिकित्सक पोर्टमार्टमका क्रममा सहभागी गराउन पाउने सहमति पछिमात्रै पोष्टमार्टमका लागि राजी भएको थिए । चिकित्सकहरुले चरीको भिसेरा परीक्षणका लागि राष्ट्रिय विधि विज्ञान प्रयोगशाला खुमलटार पठाउने भएका छन् ।
पोष्टमार्टम गर्न परिवार किन राजी भयो ?
अदालती कारबाहीका लागि मृत्यु भएको आधिकारिक कागजात आवश्यक पर्ने भएकाले चरीको परिवार पोष्टमार्टम गर्न दिन राजी भएको हो । हत्यामा संलग्न रहेकाको कारबाहीको माग गर्दै चरीका परिवारले शुक्रबार चार प्रहरी अधिकारीसहित पाँचजनाविरुद्ध सर्वोच्च अदालतमा रिट दायर गरिसकेका छन् । सर्वोच्चमा दायर गरेको रिटमा चरीको हत्या षडयन्त्रपूर्वक भएको र प्रहरीले किटानी जाहेरी लिन नमानेको भन्दै घटनामा संलग्न उपर कारबाही गर्न माग गरिएको छ ।
रिटमा महानगरीय प्रहरी परिसर हनुमानढोकालाई किटानी जाहेरी लिन पनि परमादेश माग गरिएको छ ।
रिटमा अपराध अनुसन्धान महाशाखाका प्रमुख एसएसपी पुष्कर कार्की, महानगरीय प्रहरी परिसर हनुमानढोकाका प्रमुख एसएसपी उत्तम कार्की, अपराध महाशाखाकै डिएसपी मीरा चौधरी, इन्सपेक्टर कुमुद ढुंगेल र चरीकी प्रेमिका खुस्बु ओलीका भूपू प्रेमी अर्पण कोइरालालाई विपक्षी बनाइएको छ । रिट दायर गर्न खुस्बु पनि अदालत पुगेकी थिइन् ।
यसअघि अपराध अनुसन्धान महाशाखा र महानगरीय प्रहरी आयुक्तको कार्यालयमा किटानी जाहेरी दर्ता गर्न जाँदा प्रहरीले त्यसै फर्काइदिएको थियो ।
प्रहरीले जाहेरी बुझ्न नमानेपछि आफुहरु अदालत धाउन बाध्य भएको चरीका दाजु ध्रुबले बताए । रिटको पहिलो पेशी सोमवार तोकिएको छ । चरीका परिवारले उनको शव पोष्टमार्टम गर्न जापान वा अमेरिका लैजान पाउनुपर्ने माग गर्दै आएका थिए ।
Post a Comment