२६ दिनको ‘कोहिनुर’ कलेक्शन ८ करोड माथी

प्रदर्शनको पाँचौं हप्ता प्रवेशको दिन नजिकिँदै गर्दा चलचित्र ‘कोहिनुर’ अझै लामो समय सम्म टिक्ने लक्षणका साथ सिनेमा घरहरुमा चलिरहेको छ । चलचित्रले प्रदर्शनको २६ दिनमा आईसक्दा हालसम्म ८ करोड (ग्रस) कलेक्शन क्रस गरेको वितरक सुनिल मानन्धर बताउँछन् । उनका अनुसार पछिल्लो  रुपमा दिनहरुमा अकुपेन्सीमा केहि ड्रप आएपनि तुलनात्मक अरु चलचित्रमा भन्दा बढी दर्शक ‘कोहिनुर’मा छन् ।

हालसम्म पनि देशभरका करिव ८० पर्दामा चलिरहेको यो चलचित्रले २६ दिनसम्म  ७ करोड १२ लाख (नेट) कलेक्शन गरेको मानन्धरले जानकारी दिए । त्यसो त यो चलचित्रको कलेक्शन हालसम्म प्रदर्शनमा आएका जुनकुनै नेपाली चलचित्रको भन्दा बढी हो । आउँदो हप्ता सुनिल मानन्धरले नै वितरणको जिम्मा लिएको नेपाली कलााकर ‘सुनिल थापा’को समेत अभिनय रहेको वलिउड चलचित्र ‘मेरी कोम’मा हल बाँडिने भएकोले ‘कोहिनुर’को हलहरु भने घट्नेछन् ।

अभिनेता श्रीकृष्ण श्रेष्ठको निधनपश्चात आक्रामक कलेक्शन सुरुवात गरेको चलचित्रको कलेक्शन चौथो हप्तासम्म पनि कायमै रहेपनि त्यसपश्चातका पछिल्ला केहि दिनमा भने गिरावट देखिएको वितरक बताउँछन् । चलचित्रमा श्रीसँगै उनकी पत्नि श्वेता खड्का लिड रोलमा छन् । चलचित्रलाई आकाश अधिकारीले निर्देशन गरेका हुन् ।