सौतेनी आमा मार्न खोज्ने मोडल प्रहरी खोरमा

काठमाडौं,असार२१–सौतेनी आमाको अपहरण गरी हत्या गर्न खोजेको आरोपमा एक कलाकार पक्राउ परेकी छन् । विभिन्न म्युनिक भिडियोमा अभिनय गरेकी ऋचा धमलासहित ६ जनालाई प्रहरीले पक्राउ गरेको हो ।
गठ्ठाघर बस्ने सौतेनी आमा ममता घिमिरे धमलालाई अपहरण गरी हत्या प्रयास गरेको आरोपमा परेकी ऋचा धमला,उनको प्रेमी आशमान तामाङसहित ६ जनालाई भक्तपुर प्रहरीले शुक्रबार सार्वजनिक गरेको हो । दुई व्यक्तिलाई १५ लाख रुपैयाँ दिएर सौतेनी आमाको हत्या गर्ने योजना ऋचा र विदेशमा रहेकी उनकी दिदी लिजाले तीन महिनाअघि बनाएको प्रहरी अनुसन्धानमा खुलेको छ ।
आजको नयाँ पत्रिका दैनिकका अनुसार ऋचाले प्रेमी आशमान तामाङमार्फत सौतेनी आमाको हत्या प्रयास गरेको प्रहरीले जनाएको छ । १५ असारमा ममतालाई अपहरण गर्न गएका दुई युवालाई पक्राउ गरी प्रहरीले अनुसन्धान थालेको थियो । सोही दिन बेलुका ऋचासहित अरु पक्राउ परेको भक्तपुर प्रहरीले जनाएको छ ।
पक्राउ पर्ने अन्यमा नुवाकोटका सुरेश तामाङ,शेषमान तामाङ,सुशिल नापित र राजेश गुरुङ छन् । अपहरण गर्न गएका सुरेश गुरुङ र शेषमान तामाङलाई ममताकै कोठाबाट प्रहरीले नियन्त्रणमा लिएको हो । दोस्रो विहे गरेपछि बुबाले आफ्नी आमाको हत्या गरेकाले त्यसको बदलामा ऋचाले सौतेनी आमाको अपहरण गरी हत्याको योजना बनाएको प्रहरीले जनाएको छ ।