दोस्रो राष्ट्रव्यापी बुद्धिचाल प्रतियोगिता असार १७ देखि

१५ असार, काठमाण्डौ । राष्ट्रिय बुद्धिचाल सङ्घ, नेपाल र नेपाल खेलकुद महासङ्घको आयोजनामा सर्वाधिक पुरस्कार राशिको ‘नेकोस दोस्रो राष्ट्रव्यापी बुद्धिचाल प्रतियोगिता’ यही असार १७ देखि २२ गतेसम्म सञ्चालन हुने भएको छ ।
रेटिङसहित सञ्चालन हुने प्रतियोगितामा ५० जिल्लाका २०० जना खेलाडीले सहभागिता जनाउने अन्तर्राष्ट्रिय अर्बिटर -निणर्ायक) उमेश केसीले जानकरी दिनुभयो । रु नौ लाख ६३ हजार ६०० को लागतमा हुने प्रतियोगिताको पुरस्कार रु दुई लाख ५० हजार रहेकामा विजेतालाई रु ५० हजार प्रदान गरिने छ । प्रतियोगितामा जित हासिल गर्ने विभिन्न विधाका ४१ जनालाई नगद पुरस्कार प्रदान गरिने केसीले बताउनुभयो ।
प्रतियोगितामा प्रत्येक अञ्चलबाट खेलाडीको सहभागिता होस् भन्ने हेतुले यसपटकदेखि ‘अञ्चल प्रथम’ उपाधिसमेत प्रदान गर्न लागिएको छ । काठमाडौँ नयाँबजारस्थित बहुउद्देश्यीय मार्सल आर्ट्स केन्द्रमा सञ्चालन हुने प्रतियोगितामा नेपालका प्रायः सबै शीर्ष खेलाडीको सहभागिता रहनेछ । प्रतियोगिताको सम्पूर्ण तयारी पूरा भएको जनाइएको छ।