इराक छाड्न नेपालीहरुलाई सरकारको आग्रह

९ असार, काठमाडौं । सरकारले तत्काल इराक छाड्ने नेपाली नागरिकहरुलाई आग्रह गरेको छ । इराकको सुरक्षा अवस्थामा कुनै सुधार नआएको बरु थप भूभाग असुरक्षित बन्ने खतरा रहेको भन्दै सरकारले त्यहाँ रहेका नेपालीलाई उच्च सतर्कता अपनाउन तथा छिटो इराक छोड्न अनुरोध गरेको छ ।
परराष्ट्रमन्त्री महेन्द्रबहादुर पाण्डेको उपस्थितिमा बसेको मन्त्रालयका उच्च अधिकृतहरुको बैठकमा हालसम्मको स्थिति समिक्षा हुनुका साथै आगामी कदम र उद्धारलाई अझै प्रभावकारीरुपमा सञ्चालन गर्ने विषयमा छलफल भएको थियो ।
इराकमा रहेका नेपालीलाई पारेको प्रभावका विषयमा मन्त्रालयले अनुमगनका साथै उद्धारका लागि सम्बन्धित मित्रराष्ट्र तथा अन्तर्राष्ट्रिय सङ्घसंस्थासँग समन्वय गरिरहेको मन्त्रालयले जनाएको छ ।
साथै मन्त्रालयले इराकभित्र रहेका नेपालीका विषयमा कुनै पनि प्रकारको सूचना मन्त्रालयको टोल फ्रि नम्बर १६६०-०१-००१८६ वा rescus@mofa.gov.np  मा जानकारी उपलब्ध गराउन अनुरोध गरेको छ ।