इराकमा रहेका नेपालीलाई फर्कन सरकारको आग्रह

बिहीबार , ५ असार
सरकारले इराकमा रहेका नेपाली हालसम्म सुरक्षित अवस्थामा नै रहेको र अपहरण हताहत वा अन्य घटना नपरेको जनाएको छ ।
इराकका विभिन्न शहरहरुमा चरमपन्थी विद्रोहीहरुले कब्जा लिएर त्यहाँ हिंसा बढिरहेका बेला परराष्ट्रमन्त्रालयले अहिलेसम्म कुनै नेपाली अप्ठ्यारोमा नपरेको दाबी गर्दै सहयोग गर्नुपर्ने अवस्था आएमा उद्धारका लागि सरकारले तयारी गरेको जनाएको छ ।
परराष्ट्र मन्त्रालयले ५ असारमा आयोजना गरेको पत्रकार सम्मेलनमा मन्त्रालयका प्रवक्ता दीपक धितालले भने, “ इराकको खस्कँदो सुरक्षा अवस्थाले कुनै बखत नेपालीलाई पनि प्रभावित पार्न सक्ने देखिएकाले इराकमा रहेका नेपालीलाई सुरक्षित स्थानमा बस्न, बाहिर डुल्न र ननिस्कन र सम्भव भएसम्म नेपाल फर्कन परराष्ट्र मन्त्रालय अनुरोध गर्दछ ।”
नेपाली बढी रहेको बगदाद, बसरा, कारवाला र नजाफ जस्ता शहरको सुरक्षा स्थिति तुलनात्मक रुपमा स्थिर रहेको पराराष्ट्रमन्त्रालयले जनाएको छ ।
सरकारले इराकको सुरक्षा अवस्था अझै बिग्रिएमा त्यहाँका नेपालीलाई कसरी उद्वार गर्न सकिन्छ भनेर श्रम, गृह, स्वास्थ्य, पर्यटन र परराष्ट्र मन्त्रालयका प्रतिनिधि सम्मिलित संयन्त्रसमेत बनाएको छ ।
इराकमा कति नेपाली कार्यरत छन् भन्ने आधिकारीक तथ्याङ्क सरकारसँग छैन तर, त्यहाँ उल्लेख्य सङ्ख्यामा नेपाली हरु जाने गरेका छन् । उद्धारका लागि विदेशस्थित कूटनीतिक नियोग तथा मिसन र अन्तर्राष्ट्रिय संस्थासँग पनि समन्वय गरिने परराष्ट्र मन्त्रालयले बताएको छ ।
मन्त्रालयले इराकमा कार्यरत नेपालीका आफन्त, सदस्य, इष्टमित्र वा साथीभाइ जोकोहीलाई इराकमा कार्यरत नेपाली कहाँ बस्छन् र कसरी सम्पर्क गर्न सकिन्छ भनेर जानकारी दिन आग्रह गरेको छ ।
त्यसका लागि टोल फ्रि नंको व्यवस्था गरिएको र रेस्क्यु एट द रेट मोफा डट जिओभी डट एनपी (rescue @mofa.gov.np) मा सम्पर्क गर्न सकिने मन्त्रालयले जनाएको छ ।
पाकिस्तानस्थित राजदूतावासबाट इराकको परराष्ट्र मन्त्रालयका उच्च अधिकारीसँग सम्पर्क कायम गरिएको र आवश्यक परेमा सहयोग गर्ने इराकी अधिकारीले जवाफ दिएको पनि पत्रकार सम्मेलनमा जानकारी दिइएको थियो ।