बिकिनी लगाएको आरोपमा कुवेती महिलाबाट सन्तान खोसियो

(एजेन्सी) खाडी मुलुकमध्ये एक रहेको कतारमा पर्यटकहरुलाई ‘लेगिंगस्’ नलगाउन उर्दी जारी गरिरहेको बेला अन्य खाडी मुलुकहरुमा भने पहिरनमा अझै कडाई गर्न थालिएको छ ।
हालै मात्र कुवेतका एक महिलाले बिकिनी लगाएको आरोपमा आफ्नो सन्तानबाट टाढा बस्नुपरेको छ । आफ्नो पतिसँग सम्बन्ध बिच्छेद गरेर बसिरहेकी ती महिलाले अन्य देशमा जाँदा त्यहाँको समुद्रको तटमा बिकिनी लगाएकी थिइन् ।
उनका पूर्व पतिले सोही तस्विरलाई अदालतमा पेश गरेपछि त्यहाँको न्यायाधीसले उनी आफ्ना बालबालिकालाई स्याहार्न योग्य नभएको फैसला सुनाएको थियो ।
उनका पूर्व पतिका वकिल युसुफ हुसेनले स्थानीय अल राय पत्रिकासँग कुराकानी गर्दै ती महिलाको जीवनशैली उनको बालबालिकाको लागि उपयुक्त नभएको बताएका थिए ।
यसरी बिकिनी लगाए बापत उनले आफ्ना सन्तानबाट टाढा मात्र हुनुपरेको छैन, यसका लागि उनले सजाय पनि भोग्न सक्ने त्यहाँका वकिलहरु बताउँछन् ।
कुवेतमा बिकिनी लगाउनुलाई पनि नग्नता मानिन्छ । केही समयअघि त्यहाँका कानुन निर्माताहरुले बिकिनी लगाउनेलाई कारवाही गर्न सकिने कानुन ल्याउने प्रयास समेत गरेका थिए ।