सुदर्शनको पहलमा रेखाले जापानको अग्लो हिमाल चढ्ने !

सगरमाथा चढ्ने धोको पुरा नभएपनि नायिका रेखा थापाले जापानको अग्लो पर्वत माउन्ट फुजी चढ्ने भएकी छन् । ३ हजार ७७६ मिटर अग्लो हिमाल चढ्न रेखा आउँदो जुलाई १३ मा हिम्मतवाली अभिनेता सुदर्शन गौतमसँग जापान उड्ने छिन् ।
दुबै हात बिना विश्वकै अग्लो हिमाल सगरमाथा चढिसकेका सुदर्शनकै पहलमा रेखाले फुजी आरोहण गर्न लागेकी हुन् । यसका लागि सिनेमा तथास्तुको सुटिङसँगै आरोहण कला सिक्न व्यस्त छिन् । एक जापानी माउन्टेनियरिङ कम्पनीले रेखा र सुदर्शनलाई हिमाल चढाउन लागेको बुझिएको छ ।
यसअघि सगरमाथा चढ्ने तयारीमा जुटेकी अभिनेत्रीलाई आमाले रोकेकी थिइन् । तर, विश्व सम्पदा सूचिमा संग्रहित होन्सु टापुमा रहेको फुजी चढ्ने कुरालाई लिएर उनी उत्साहित छिन् । साता लामो जापान भ्रमणमा रेखाले रेखा फाउन्डेसनको केही काम पनि पुरा गर्ने भएकी छन् ।
युट्युवमा रेखाको रेकर्ड
आठ दिनमै रेखा निर्देशित सिनेमा हिम्मतवालीको गीत ‘तिमीले छोएर…’लाई भिडियो साझेदारी साइट युट्युवमा ९० हजारभन्दा बढीले हेरेका छन् । बुधबार अपरान्ह ३ बजेसम्मको हेराई हो यो । दसैं फूलपातिमा रिलिज हुने फिल्मको यो गीतले सर्वाधिक चाँडो हेरिनेको रेकर्ड राखेको छ ।