घाँटीमा खुकुरी राखेर ५ लाख रूपैयाँ बराबरको धनमाल चोरी

७ असार, भक्तपुर । भक्तपुरको सिरुटा-२ गाविस भवन नजिकै एकघरमा हतियारसहित पसेको समूहले पाँच लाख ५० हजार बराबरको धनमाल  लुटेको छ ।
श्रीमान् विदेश रहेका प्रगति थापाको एकतले घरको छतबाट गएराति करिब १ बजे घरभित्र प्रवेश गरेका तीनजनाको समूहले १२ वर्षीया छोरीसँगै सुतेकी थापाको घाँटीमा खुकुरी राखेर धनमाल लुटेका हुन् ।
खुकुरी र पेस्तोलसहित घरभित्र प्रवेश गरेका समूहले साढे ४ तोला सुनका गरगहना, रु ४५ हजार नगद, ल्यापटप एक थान, ट्यावलेट एक थान र मोबाइल दुई थान लुटेर लगेको स्थानीय बासिन्दा शशीजङ्ग थापाले जानकारी दिनुभयो ।
कालो लुगामा माक्स लगाएर आएका समूहले आधाघण्टाको बीचमा सामान लिएर करिब २ बजे गएपछि थापाले होहल्ला गरेकी थिइन् । घरमा लुटपाट गरेपछि लुटेरा मोटरसाइकलमा भागेका स्थानीयवासीले बताएका छन् ।