एमाओवादी कहिले चील, कहिले सिंह !

७ साउन, काठमाडौं । एकीकृत नेकपा माओवादीका नेता डा. बाबुराम भट्टराईले आफ्ना जुँगा उखेल्नेलाई सजायँ दिनुको साटो मिठाई दिने बताउनुभएको छ । ललितपुृरको खन्ना गार्मेन्टमा आयोजित विस्तारित बैठकको अन्तिम दिन अकबर र वीरबलको कथा सुनाउँदै डा. भट्टराईले यस्तो बताउनुभएको हो ।

विस्तारित बैठकमा भट्टराईले सुनाएको कथा  :

एकदिन अकबरले ठूलो भारदारी सभाको आयोजना गरेका थिए । वीरबल पनि अकबरकै छेउमा बसेका थिए । सभामा अकबरले सहभागीहरुलाई प्रश्न गरे, ‘कसैले मेरा जुँगा उखेल्यो भने त्यसलाई कस्तो सजायँ दिनुपर्ला ?’

अकबरको प्रस्तावमाथि टिप्पणी गर्दै भारदारमध्ये कसैले जुँगा उखेल्नेलाई झुन्ड्याएर मार्नुपर्ने बताए भने कसैले काटेर टुक्रा टुक्रा पार्नुपर्ने बताए । त्यसपछि अकबरले नजिकै रहेका वीरबललाई सोधे, ‘तिमी त केही पनि बोल्दैनौ त, किन हो ?’

अकबरको प्रश्न सुनेपछि वीरबलले भने, ‘महाराजको जुँगा उखेल्ने हिम्मत कसको ? उखेले पनि आपimन्तहरुले नै उखेल्लान् । अझ काखैमा बसेको नातिले मात्रै उखेल्न सक्ला । आफ्नो नातिलाई के सजायँ दिने ? उसलाई त जुँगा उखेलेवापत चकलेट दिनुपर्छ ।’

हाम्रा जुँगा उखेल्नेलाई मिठाई

विस्तारित बैठकमा कथा सुनाइसकेपछि डा. भट्टराईले नेता, कार्यकर्ताहरुतर्फ लक्षित गर्दै भन्नुभयो, तपाईहरुले पनि हाम्रा जुँगा उखेल्नुभयो, कपाल तान्नुभयो, कान बटार्नुभयो, तर तपाईहरु सबै आफ्नै मान्छे भएकाले यसवापत तपाईहरुलाई मेरा तर्फबाट मिठाई उपहार दिन चाहन्छु । हामीलाई आलोचना गर्ने सबै साथीहरुलाई धन्यवाद दिन चाहन्छु ।’

एमाओवादी कहिले चील, कहिले सिंह !

एमाओवादी विस्तारित बैठकमा कथा र उखान टुक्का सुनाउने भट्टराई एक्ला नेता चाहिँ होइनन् । बैठकमा छलफलका सिलसिलामा कालीबहादुर मल्लले कुकुरको पुच्छर र अर्का नेता विष्णुहरी शर्माले ‘कांग्रेस नेताको कमन सेन्स’ बारे जोक सुनाएका थिए । बैठकमा मिथक प्रयोग गर्न प्रचण्ड पनि कम देखिनुभएन । प्रचण्डले बैठकको शुरुमा एमाओवादी पार्टीलाई कुखुरो नभएर आकाशमा उडान भर्न सक्ने चीलको उपमा दिनुभयो । प्रचण्डको भनाइमाथि दिनभरिजसो सामाजिक सञ्जालमा टिप्पणी भयो । वैठकको समापनका दिन आइतबार प्रचण्डले एमाओवादी पार्टी भेडा नभएर सिंह भएको बताउँदै विस्तारित बैठकपछि सिंह गर्जिने बताउनुभयो ।